उप्रेती समाजसेवा समितिको साधारण सभा सम्पन्न भएको छ। काठमाडौँ बत्तीसपुतलीस्थित होटल तपसमा २०८१ मङ्सिर २९ गते शनिबार सम्पन्न कार्यक्रममा देशका विभिन्न जिल्लाहरूबाट उप्रेती वंशजबन्धुहरूको उपस्थिति रहेको थियो।

महासचिव लक्ष्मण प्रसाद उप्रेती सञ्चालन गर्नुभएकाे उक्त कार्यक्रमको औपचारिक थालनीपूर्व शुभारम्भमा दिवंगत वंशजबन्धुहरूको सम्झनामा सामूहिक श्रद्धाञ्जली स्वरूप मौन धारण गरिएको थियो भने उप्रेती परिवारमा जन्म लिएर र वैवाहिक सम्बन्ध मार्फत जोडिएका सदस्यहरूका लागि ताली बजाएर स्वागत गरिएको थियो।

समाजका अध्यक्ष सोभियत उप्रेतीको अध्यक्षतामा सञ्चालित उक्त साधारण सभामा पूर्व अध्यक्ष द्वय नीलकण्ठ उप्रेती र मोहन कृष्ण उप्रेती विशेष अतिथिका रूपमा उपस्थित हुनुहुन्थ्यो।

महिला विभाग प्रमुख कमला उप्रेतीले आगामी साधारण सभा आफ्नै भवनमा गर्न सकियोस्, तीज लगायतका कार्यक्रमहरू आफ्नै भवनमा आयोजना गर्न सकियोस् भन्दै सहभागी वंशजबन्धुहरूलाई स्वागत गर्नुभएको थियो । कार्यक्रममा उप्रेती पूर्वजहरूद्वारा निर्मित ऐतिहासिक एवं धार्मिक स्थल पिपलटार, काभ्रेपलाञ्चाेक स्थित पातलेश्वर महादेव मन्दिरको परिचयात्मक वृत्तचित्र पनि प्रस्तुत गरिएको थियो।

उप्रेती समाजका लागि निरन्तर सद्भाव र सहयोग प्रदान गरिरहनुभएका पाँचथर निवासी हाल क्यानडामा बसोबास गरिरहनुभएका सुरेन उप्रेतीद्वारा उप्रेती समाजसेवा समितिलाई अमेरिका, क्यानडा लगायतका देशहरूमा बसोबास गरिरहेका उप्रेती बन्धुहरू माझ अझ विस्तार गर्ने प्रतिबद्धता जाहेर गर्नुभएको थियो।

महासचिव लक्ष्मण प्रसाद उप्रेतीले कार्यक्रममा उप्रेती समाजसेवा समितिका विगतका कार्यसमितिहरूद्वारा सम्पन्न विविध क्रियाकलापहरू र वर्तमान कार्यसमितिले सत्र महिनाको अवधिमा गरेका क्रियाकलापहरू बारे जानकारी प्रतिवेदन प्रस्तुत गर्नुभएको थियो भने कोषाध्यक्ष खेमराज उप्रेतीले वर्तमान कार्य समितिका आर्थिक गतिविधिहरू र आर्थिक अवस्थासम्बन्धी प्रतिवेदन प्रस्तुत गर्नुभएको थियो। समाजको स्मारिका “उप्रेती संसार – ३” को लोकार्पण गरिएको उक्त कार्यक्रममा “उप्रेती संसार – ३”का सम्पादक एवं समाजका प्रकाशन विभाग प्रमुख नन्दु उप्रेतीले स्मारिकामा संग्रहित सिर्जनामूलक, अनुसन्धानमूलक र तथ्याङ्कमूलक लेख रचना र विवरणहरूका बारेमा प्रकाश पार्नुभएको थियो।

पूर्व अध्यक्ष एवं उप्रेती संसार – ३ का सल्लाहकार सम्पादक इन्जिनियर मोहन कृष्ण उप्रेतीले स्मारिकामाथि समीक्षा प्रस्तुत गर्नुभएको थियो। डाक्टर सृजना शर्मा उप्रेती, पूर्व अध्यक्ष नीलकण्ठ उप्रेतीले शुभकामना व्यक्त गर्दै उप्रेती समाजसेवा समितिका गतिविधिहरू अझ सशक्त बन्नेछन् भन्ने शुभकामना व्यक्त गर्नुभएको थियो। सभाले रिक्त उपाध्यक्ष पदमा कार्यसमिति सदस्य एवं महिला विभाग प्रमुख कमला उप्रेतीलाई उपाध्यक्ष एवं केन्द्रीय कार्यालय व्यवस्थापन समितिको संयोजक र केन्द्रीय सदस्य सुरेन्द्र उप्रेतीलाई वंशावली संकलन एवं परिमार्जन समितिको संयोजकका रूपमा चयन गर्ने कार्यसमितिकाे प्रस्तावलाई अनुमोदन गरेको थियो। आफूलाई प्रदान गरिएको जिम्मेवारी पूरा गर्न लागिपर्ने प्रतिबद्धता व्यक्त गर्दै उक्त जिम्मेवारी प्रदान गरिएकोमा कमला उप्रेतीले समाजप्रति आभार व्यक्त गर्नुभएको थियो। सहभागीहरूका तर्फबाट डाक्टर इन्जिनियर सञ्जय उप्रेतीले आफ्ना विचारहरू व्यक्त गर्नुभएको थियो । अध्यक्ष शोभित उप्रेतीले समाजका गतिविधिहरू अझ प्रभावकारी बनाउने र समाजको केन्द्रीय कार्यालय व्यवस्थापनको कार्य वर्तमान कार्यसमितिले नै सम्पन्न गर्ने प्रतिबद्धता व्यक्त गर्नुभएको थियो। उहाँले सम्पूर्ण उप्रेती वंशज बन्धुहरूको भावनात्मक एकता र सहयोगबाट उप्रेती समाजसेवा समितिका प्रत्येक कार्यहरू सफल हुने विचार व्यक्त गर्नुभएको थियो। साथै अध्यक्ष शोभित उप्रेतीले केन्द्रीय कार्यालय व्यवस्थापनका लागि साथ सहयोगको हातेमालो गर्न सम्पूर्ण उप्रेती वंशजबन्धुहरूलाई हार्दिक आग्रह गर्नुभएको थियो। वरिष्ठ उपाध्यक्ष ओमप्रसाद उप्रेतीले उप्रेती समाजसेवा समितिको विगत र वर्तमानका बारेमा चर्चा गर्दै सबै सहभागीहरूप्रति धन्यवाद प्रदान गर्दै अध्यक्षकाे अनुमति अनुरूप सभाको समापन गर्नुभएको थियो।